III TORNEO CASA ROCÍO

Pasou o torneo de Casa Rocío nunha noite moi agradable tras a calor do día. Alguén comentaba que podería chover, pero foi moito máis tarde, xa de madrugada. E tivemos moita sorte, pois en Casa Rocío sempre lembraremos a primeira edición na que o vento levantounos algúns taboleiros.

E esta vez non houbo problemas coa iluminación: acendeu xunto co alumeado público. E malia que parecía que unha ringleira de mesas quedaría un pouco escura, as luces dos escaparates deron luz abondo para poder xogar.

A participación foi moi alta, superou o tope que tiñamos de 80 xogadores. Chegamos a ser 86 inscritos, máis algúns participantes que avisaron de que non poderían vir. Houbo algunha baixa segundo pasaban as rondas e tamén Juan Benito apuntouse para a quinta ronda.

Nesta ocasión tamén había fútbol, pero da selección do Fontecarmoa pois moitos compañeiros foron xogar pola tarde rememorando o tradicional partido de fin de temporada. O resultado foi variable e non nos quedoou moi claro: parece que no tempo regulamentario a cousa iba 3-1 pero cando se deixou de xogar xa iba 4-3. A formalidade é similar a dos torneos nocturnos.

Tivemos algún problema informático que non nos permitiu empezar en hora. O retraso foi lixeiro, apenas 10-15 minutos, que foi hábilmente achacado ó fallo informático que paralizou medio mundo pola mañá. E se pararon aeroportos, hospitais, empresas, etc. o noso retraso non é nada.

Para a entrega de trofeos contamos ca nosa patrocinadora, Rocío, xerente da casa homónima. E no arbitraxe non puidemos contar con Lucas, que marchara a Oviedo para o casamento do seu irmao, Christian, a quen queremos felicitar e desexarlle o mellor en nome do club.

En canto a clasificación, o podio absoluto estivo copado polo CX Fontecarmoa. Os 5 primeiros clasificados foron do noso club, e foi o campión Alexander Zambrano. Canda el estiveron David Suárez, Julio Suárez, Julio Torrado e Andrea Dorado. Andrea foi tamén a campiona feminina.

No podio veterano houbo máis diversidade, ainda que tamén tivemos representación do club. O campión foi Antonio Susavila, do club de Padrón. Foi segundo Alejandro Prado, da Illa, do club Dorna e o terceiro foi o noso compañeiro e organizador Manolín. Como o fillo, el tamén leva premios.

Na categoría sub18 coláronse dous alevíns, o campión Telmo Vicente que veu de Rianxo e o teceiro Andrés Cacabelos, da Escola de Pontevedra. No medio deles Iván Sánchez, da Escola de Santiago.

Por mor diso, e de que os premios non son acumulables (agás o feminino), o trofeo do campión sub12 foi para Noé Diz, un pequeno gran afeccionado do club de Padrón. O segundo veu de máis lonxe, de Pereiro do Aguiar, Brian Gómez do Benchoshey. E o terceiro foi Xoel Roo, do Marquiño, o club da Pobra.

E rematamos como sempre agradecendo a todos os que fixeron posible este torneo, empezando polos xadrecistas, compañeiros e amigos que xogaron, e ós que colaboraron coa montaxe e recollida do material. Tamén a Rocío, a nosa patrocinadora pola súa colaboración económica e polo «avituallamento» fornecido hasta ben pasada a media noite. E o Concello e a súa Fundación de Deportes polo apoio loxístico de mesas, sillas e iluminación.

CLASIFICACIÓN FINAL